МУБИС-ийн хичээлийн III байрны номын сан 24 цагийн үйлчилгээ үзүүлж эхэлсэн бөгөөд нээлтээ хийлээ. Нээлтэд МУБИС-ийн захирал, удирдлагуудын төлөөлөл, багш нар, номын сангийн хамт олон, оюутан суралцагчид оролцож 24 цагийн танхимаар үйлчлүүлэх анхны захиалгаа өглөө.
24 цагийн үйлчилгээтэй номын санг нээж МУБИС-ийн захирлын албан үүргийг түр орлон гүйцэтгэгч О.Алтангоо хэлэхдээ “Сурган хүмүүжүүлэх багш бэлтгэдэг, улсынхаа хамгийн том сургуулийн хувьд сургуулийн номын санг бүх талаар дэмжиж ирсэн, цаашид ч тасралтгүй дэмжихээ илэрхийлэн энэхүү 24 цагийн үйлчилгээтэй номын санг ирээдүйд бусад салбарууд дээрээ ч нээх боломжтойг дурдаад шинэ үйлчилгээ эхлүүлж байгаа номын сангийн хамт олон, нийт уншигч оюутнууддаа баяр хүргэлээ.
Мөн Эрдэм шинжилгээ инновацийн албаны дарга Я.Шийлэгмаа “24 цагийн үйлчилгээтэй номын сан нь уншигчдын эрэлт хэрэгцээнд тулгуурлан нээгдэж байгаа тул тав тухтай үйлчлүүлэхийг нийт оюутнууддаа хүсээд цаашид уншигчдынхаа санал хүсэлтийг байнга авч өөр өөр шинэлэг үйлчилгээг нэвтрүүлэн ажиллах болно” гэж хэлэв.
Ингээд ирсэн зочид 24 цагийн номын сангийн үйлчилгээг авах танилцуулга видеог үзэж, танхимын тохижилт, тав тух, дүрэм журамтай танилцан өнөөдрөөс буюу 2022 оны 11 сарын 23-ны өдрөөс эхлэн тус танхимаар үйлчлүүлэх захиалгаа авч эхэллээ.
24 цагийн үйлчилгээтэй номын санд цэвэр усны төхөөрөмж, хоол халаах цахилгаан зуух, гар утас, нөүтбүүкээ цэнэглэх хангалттай цэнэглэгч, хөл, нуруугаа амраах тухлаг буйдан, чөлөөтэй авч уншиж судлах ном бүхий тавиур зэргийг байрлуулсан. МУБИС-ийн оюутан суралцагч та бүхэн энэхүү 24 цагийн номын сангийн үйлчилгээг МУБИС-ийн номын сангийн вэб сайт https://library.msue.edu.mn/, номын сангийн цахим каталог https://catalog.msue.edu.mn/ хаягуудаас захиалгаа өгч авах боломжтой.
Захиалга хийх заавар: https://www.youtube.com/watch?v=JnP12bYCm00
МУБИС-ийн номын сан цаашдаа бүх оюутны байрууддаа номын сангийн танхим байгуулан, ном хэвлэлээр бүрдүүлэх ажлыг эхлүүлээд байна.
