МЭНДЧИЛГЭЭ

Эрхэм хүндэт эрдэмтэн багш, оюутан суралцагчид, ажилтан, албан хаагчид та бүхэндээ болон 2021-2022 оны хичээлийн жилд тус сургуулийг сонгон шинээр элссэн оюутан залуустаа Монгол Улсын орчин  цагийн боловсролын тогтолцооны 100 дахь хичээлийн жил, МУБИС-ийн түүхт 70 жилийн ой тохиож буй хичээлийн шинэ жилийн баярын мэндийг дэвшүүлье.

Дэлхий нийтийг хамарсан COVID-19 цар тахлын улмаас багагүй хугацаанд цахимаар хичээллэсэн оюутан суралцагчид та бүхэнтэйгээ эрдмийн өргөөндөө хамтдаа сурч, хөгжих сайхан боломж эргэн ирж байгаад сургуулийн удирдлага, профессор багш, нийт хамт олон бид баяртай байна. Та бүхэн ч гэсэн найз нөхөдтэйгээ болон  бидэнтэйгээ уулзсанд баяртай байгаа байх аа.

Улс орон бүр өөрсдийн боловсролын хөтөч үзлийг “XXI зууны боловсрол”, “Тэгш хөгжлийн төлөөх боловсрол”, “Дэлхийн иргэний боловсрол”-д чиглүүлэн өөрчлөн шинэчилж, түүнийгээ ажил хэрэг болгохыг зорьж буй энэхүү цаг үед МУБИС-ийн хамт олон бид ч мөн тэдэнтэй хөл нийлүүлэн алхаж, чанартай, чадварлаг багшийг бэлтгэхийн төлөө ажиллаж байна, цаашид ч улам эрчимтэй ажиллахыг нийгэм биднээс шаардаж байна.

2021-2022 оны хичээлийн жилд, МУБИС-ийн хамт олон бид  сургалтад баримтлах бодлогоо “Суралцахад сурах”-д  чиглүүлэн танхимын болон цахим, тэдгээрийн хосолсон сургалтын үйлчилгээг чанарын өндөр түвшинд үзүүлэхэд онцгойлон анхаарч ажиллах болно.

Түүнчлэн, энэ хичээлийн жилд ахисан түвшний сургалт-судалгааны чанарыг дээшлүүлэхэд түлхүү анхаарч, цаашид судалгаанд суурилан хөгждөг их сургууль болох үндэс сууриа бэхжүүлж, боловсролын талаарх өөрсдийн өв соёлыг дэлхийн нийтийн чиг хандлагатай тэнцвэртэйгээр хослуулан, гадаад дотоод хамтын ажиллагаа, сонирхлын бүлгүүдийн оролцоо хийгээд түншлэлд тулгуурлаж, академик эрх чөлөө, тэгш байдал, эрдэм чанарыг дээдлэн ажиллана.

Суралцахуйд сурсан, тасралтгүй  хөгжигч, олон улсад өрсөлдөх хийгээд хөрвөх чадвартай, оюунлаг бүтээлч, хариуцлагатай  “Эрдэмтэй багш хүн” бэлтгэдэг мэдлэг үйлдвэрлэгч их сургууль болох замаар боловсролын салбарын  хөгжилд  болон  нийгэмд үзүүлэх нөлөө, байр суурь, бие даасан байдлаа дээшлүүлэхэд МУБИС-ийн эрдэмтэн багш нар, оюутан суралцагчдын маань хичээл зүтгэл, хувь нэмэр хамгийн чухал, үнэ цэнтэй төдийгүй бид бүхний идэвхтэй оролцоо, харилцан ойлголцол, хамтын ажиллагаа юу юунаас чухал байна.

МУБИС-ийн удирдлагын зүгээс багш, суралцагчдынхаа сурч, ажиллах боломж нөхцөл, сургалтын орчин, материаллаг баазыг тасралтгүй сайжруулсаар ирсэн төдийгүй бид өнөөгийн санхүү, хөрөнгө оруулалтын байдалдаа бодит шинжилгээ хийн цаашид баримтлах бодлого чиглэлээ тодорхойлон ажиллахдаа багш нарынхаа судалгаа шинжилгээ хийх, мэдлэг мэргэжлээ дээшлүүлэх, оюутныхаа сурч хөгжих үйл ажиллагаануудыг түлхүү дэмжих чиглэлийг баримтлан ажиллана.

Хамтдаа хамтран МУБИС-иа Монголын боловсролын “цөм” болгон хөгжүүлцгээе. Хүн бүхэн эрүүл байж, эрдэм боловсролыг дээдэлж, дэм дэмэндээ дэвжин хөгжицгөөе. Та бүхэндээ ажил, сурлага, хөдөлмөрийн өндөр амжилт хүсэн ерөөе.

Номын цагаан буян дэлгэрэх болтугай.

 

МУБИС-ийн захирлын албан үүргийг

түр орлон гүйцэтгэгч  доктор, дэд профессор О.Алтангоо